Na Mwandishi Wetu, Tanga
ASKOFU Mkuu wa Kanisa la The Free Pentecostal Church of Tanzania (FPCT), Stivie Mulenga, ametoa onyo kali kwa viongozi wa dini nchini kuacha mara moja kutumia majukwaa ya kidini kuhubiri uchonganishi na chuki, badala yake wahubiri amani, upendo, na mshikamano wa kitaifa.
Akizungumza katika Ibada Maalum ya Pasaka jijini Tanga, Askofu Mulenga amesisitiza kuwa madhabahu ni mahali patakatifu pa kumtukuza Mungu na siyo jukwaa la mashambulizi ya binafsi, upendeleo, au chuki zinazoweza kuigawa jamii na kuhatarisha usalama wa nchi.
"Ni muhimu kwa viongozi wa dini kutambua uzito wa majukwaa waliyonayo. Ibada zinapaswa kubaki kuwa chemchemi ya upendo na uvumilivu. Tunapofanya kinyume chake na kueneza mifarakano, tunasaliti msingi wa imani ya Kikristo ambayo chimbuko lake ni amani aliyoiacha Yesu Kristo," alisisitiza Askofu Mulenga.
Uhuru wa Kuabudu na Mmomonyoko wa Maadili
Katika mahubiri hayo yaliyosheheni ujumbe wa kizalendo, Askofu Mulenga ameipongeza Serikali kwa kuendelea kulinda uhuru wa kuabudu, akibainisha kuwa ingawa Serikali haina dini, wananchi wake wana haki ya kuishi kwa mujibu wa imani zao bila kuvunja sheria. Hata hivyo, alielezea wasiwasi wake juu ya kuongezeka kwa mmomonyoko wa maadili na tamaa binafsi ambazo zimekuwa chanzo cha ukatili wa kijinsia na vitendo vinavyoishangaza jamii.
Alitoa wito kwa viongozi wa madhehebu yote kuwa mstari wa mbele kulaani ukatili wa kijinsia na kuelimisha waumini wao juu ya kurejea katika misingi ya utu. Alisisitiza kuwa Pasaka inapaswa kuwa ishara ya ushindi wa nuru juu ya giza, na hivyo viongozi wa dini wanapaswa kuwa "taa" ya jamii badala ya kuwa chanzo cha giza la migawanyiko.
Wito kwa Taifa
Akihitimisha ujumbe wake, Askofu Mkuu Mulenga amewataka Watanzania wote kuthamini amani iliyopo kama msingi wa maendeleo endelevu. Amesema dunia kwa sasa inakabiliwa na changamoto nyingi za kijamii na kiuchumi, hivyo sauti ya viongozi wa dini inapaswa kuwa tulizo na daraja la mapatano ili kujenga taifa imara lenye hofu ya Mungu na heshima kwa utu.
Mwisho
